نیوز ڈیسک
اسلام آباد: صحافیوں کے حقوق کے لیے کام کرنے والی عالمی ایوارڈ یافتہ تنظیم فریڈم نیٹ ورک نے اپنی سالانہ رپورٹ "فریڈم آف ایکسپریشن اینڈ میڈیا فریڈم 2025” جاری کر دی ہے، جس میں پاکستان میں آزادی اظہار اور میڈیا کو درپیش خطرات پر گہری تشویش ظاہر کی گئی ہے۔
رپورٹ کے مطابق مئی 2024 سے اپریل 2025 کے دوران پاکستان میں پانچ صحافی دورانِ ڈیوٹی جاں بحق ہوئے، جن میں تین کا تعلق سندھ اور دو کا خیبر پختونخوا سے تھا۔ اس عرصے میں کم از کم 82 صحافیوں اور میڈیا سے وابستہ افراد کو مختلف نوعیت کی دھمکیوں کا سامنا بھی کرنا پڑا۔ خیبر پختونخوا صحافیوں کے لیے سب سے زیادہ خطرناک صوبہ قرار پایا، جہاں 22 مقدمات درج کیے گئے، جب کہ اسلام آباد میں 20 اور پنجاب میں 18 مقدمات سامنے آئے۔
رپورٹ میں اس بات پر زور دیا گیا ہے کہ پاکستانی میڈیا نہ صرف سینسرشپ اور قانونی دباؤ کا شکار ہے، بلکہ صحافیوں کو بھی بڑھتے ہوئے دباؤ اور عدم تحفظ کا سامنا ہے۔ صحافیوں پر درج ہونے والے 14 مقدمات میں سے بیشتر کا تعلق سائبر کرائم قانون (PECA) کے تحت تھا، جبکہ دیگر مقدمات میں متعدد صحافی گرفتار یا زیرِ حراست بھی رہے۔
تنظیم نے موجودہ صورتحال کو میڈیا کے وجود کے لیے سنگین خطرہ قرار دیا ہے اور کہا ہے کہ آزادی صحافت اس وقت شدید دباؤ میں ہے۔ اقبال خٹک، ایگزیکٹو ڈائریکٹر فریڈم نیٹ ورک کے مطابق، پاکستان میں میڈیا کے لیے یہ غیرمعمولی اور خطرناک دور ہے جو نہ صرف جمہوریت بلکہ شہریوں کے معلومات تک رسائی کے حق کو بھی متاثر کر رہا ہے۔
رپورٹ میں خواتین صحافیوں کو درپیش چیلنجز کا بھی ذکر کیا گیا ہے۔ اگرچہ میڈیا میں ان کی شمولیت بڑھی ہے، تاہم ان کی نمائندگی میں اب بھی نمایاں عدم توازن موجود ہے۔
فریڈم نیٹ ورک نے سفارش کی ہے کہ آئینی سطح پر آزادی اظہار اور بنیادی شہری حقوق کے تحفظ کے لیے ایک قومی تحریک کا آغاز کیا جائے۔ اس تحریک کو مضبوط بنانے کے لیے عوام، سول سوسائٹی، اور دیگر اسٹیک ہولڈرز کو فعال کردار ادا کرنے کی دعوت دی گئی ہے۔
رپورٹ میں ڈیجیٹل دور میں شہریوں کے آن لائن حقوق کے تحفظ کے لیے ایک نئے قومی چارٹر کی بھی تجویز دی گئی ہے، جو انٹرنیٹ تک مساوی رسائی، معیاری کنیکٹیویٹی، اور اظہار رائے کی آزادی کو یقینی بنائے۔
