نمائندہ ریاض بلو چ
چاغی: چاغی پولیس نے دالبندین میں بروقت کارروائی کرتے ہوئے دہشت گردی اور اغوا برائے تاوان کی منصوبہ بندی کو ناکام بنا دیا۔تفصیلات کے مطابق ترجمان کے مطابق فیصل کالونی دالبندین کے مقام پر تعینات پولیس موبائل ٹیم نے ایک مشتبہ ہائی لکس گاڑی کو دیکھا، جس میں مسلح افراد سوار تھے۔ پولیس کو دیکھتے ہی مشتبہ دہشت گردوں نے فائرنگ کر دی۔ پولیس کی جوابی کارروائی اور تعاقب این ایل سی ایریا دالبندین تک جاری رہا۔
فائرنگ کے تبادلے کے دوران ایک دہشت گرد کو ہائی لکس گاڑی اور بھاری اسلحے سمیت گرفتار کر لیا گیا۔ بعد ازاں علاقے میں سرچ آپریشن کے دوران مزید ایک مشتبہ دہشت گرد کو بھی حراست میں لے لیا گیا۔
ابتدائی تحقیقات میں انکشاف ہوا ہے کہ گرفتار دہشت گرد علاقے میں دہشت گردی اور اغوا برائے تاوان کی وارداتوں کی منصوبہ بندی کر رہے تھے۔ پولیس کے مطابق تیسرے مشتبہ دہشت گرد کی تلاش کے لیے سرچ آپریشن جاری ہے۔
چاغی پولیس کے ترجمان نے کہا کہ بروقت کارروائی سے علاقے کو بڑی تباہی سے بچا لیا گیا ہے
