نمائندہ خصوصی :
خضدار میں نامعلوم مسلح افراد نے ایک تعمیراتی کمپنی کے کیمپ پر حملہ کر کے 18 مزدوروں کو اغوا کر لیا جبکہ متعدد گاڑیوں کو نذر آتش کر دیا۔ اطلاعات کے مطابق یہ مزدور ایک سڑک کی تعمیر کے منصوبے پر کام کر رہے تھے جب حملہ آوروں نے اچانک کیمپ پر دھاوا بول دیا۔
سیکیورٹی ذرائع کے مطابق حملہ آوروں نے موقع پر موجود محافظوں کو قابو میں لینے کے بعد مزدوروں کو نامعلوم مقام پر منتقل کر دیا۔ واقعے کے بعد قانون نافذ کرنے والے اداروں نے علاقے میں سرچ آپریشن شروع کر دیا ہے جبکہ حکام کا کہنا ہے کہ مغوی مزدوروں کی بحفاظت بازیابی کے لیے تمام تر وسائل بروئے کار لائے جا رہے ہیں۔
ادھر واقعے کی تحقیقات بھی شروع کر دی گئی ہیں تاکہ حملے کے محرکات اور ملوث عناصر کا تعین کیا جا سکے۔
یہ واقعہ اس وقت پیش آیا ہے جب ایک روز قبل ضلع مستونگ میں ایک عسکریت پسند گروہ نے 9 افراد کو اغوا کر لیا تھا، جس سے صوبے میں سیکیورٹی کی بگڑتی ہوئی صورتحال پر تشویش مزید بڑھ گئی ہے۔
گزشتہ ایک ہفتے کے دوران بلوچستان سے اغوا ہونے والے مزدوروں کی تعداد 27 ہو گئی ہے، جس پر مقامی آبادی اور سماجی حلقوں نے حکومت سے مطالبہ کیا ہے کہ مزدوروں اور ترقیاتی منصوبوں پر کام کرنے والے عملے کے تحفظ کے لیے مؤثر اقدامات کیے جائیں۔
